EMTA və “Bank Respublika” arasında əməkdaşlıq müqaviləsi imzalanıb

Enerji Məsələlərini Tənzimləmə Agentliyi (EMTA) ilə “Bank Respublika” ASC arasında müvəkkil kredit təşkilatı vasitəsilə Enerji effektivliyi fondunun vəsaiti hesabına güzəştli kreditlərin verilməsinə dair əməkdaşlıq müqaviləsi imzalanıb.

Müqaviləni EMTA-nın İdarə Heyətinin sədr müavini Rövşən İsmayılov və “Bank Respublika” ASC-nin İdarə Heyəti sədrinin müavini Elnur Həsənov imzalayıblar.

İmzalanma mərasimində Rövşən İsmayılov Fondun fəaliyyət istiqamətindən danışıb və bildirib ki, banklarla əməkdaşlıq vasitəsilə Fondun vəsaiti hesabına enerji effektivliyi üzrə tədbirlərin həyata keçirilməsinin təşviqi məqsədilə güzəştli kreditlər veriləcək. O, “Bank Respublika” ilə əməkdaşlıqda həyata keçiriləcək enerji səmərəliliyi layihələrinin uğurlu olacağına ümidvar olduğunu qeyd edib.

Elnur Həsənov qarşılıqlı əməkdaşlıqda Fondun yaratdığı imkanlar hesabına enerji effektivliyi üzrə tədbirlərin həyata keçirilməsində maraqlı olduqlarını bildirib. Əməkdaşlıq müqaviləsi çərçivəsində bu istiqamətdə layihələrin dəstəklənməsində mümkün perspektivləri diqqətə çatdırıb.

Qeyd edək ki, Enerji effektivliyi fondu Prezident İlham Əliyevin 1 mart 2024-cü il tarixli Fərmanı ilə yaradılıb. Fondun vəsaitlərinin idarə olunmasını Enerji Məsələlərini Tənzimləmə Agentliyi (EMTA) həyata keçirir. EMTA Azərbaycan Respublikası Prezidentinin 22 dekabr 2017-ci il tarixli Fərmanı ilə Energetika Nazirliyinin tabeliyində publik hüquqi şəxs statusu ilə yaradılıb.

Fortunamag.az