Şahzadə Harri və həyat yoldaşı Meqan Markl Böyük Britaniyaya qayıtmağa hazırlaşırlar.
Fortunamag.az “The Telegraph” qəzetinə istinadən xəbər verir ki, hazırda ABŞ-nin Kaliforniya ştatında yaşayan Sasseks hersoqu və hersoqinyası bu ayın sonunda Londondan kənarda yerləşən şəxsi iqamətgaha köçməyi planlaşdırır. Cütlüyün 7 yaşlı Şahzadə Arçi və 5 yaşlı Şahzadə Lilibeti qarşıdakı tədris ili üçün Britaniyadakı məktəblərə yazdırdığı da bildirilir.
Məlumata görə, Kral III Çarlz Harri və Meqanın Britaniyaya köçmək planından ilk dəfə bazar günü xəbər tutub. Bu isə onların iyul ayında Britaniyaya ailə səfəri zamanı məsələni müzakirə etmədiklərini göstərir.
CNN-in məlumatına görə, Kral Çarlz ailəsinin daha çox üzvünü şəxsən görmək imkanını alqışlayır. Bununla belə, Harri və Meqanın kral ailəsindəki statusunda hər hansı dəyişiklik nəzərdə tutulmur.
Harri və Meqan 2020-ci ildə kral ailəsinin üzvləri kimi fəaliyyətlərini dayandıraraq Böyük Britaniyanı tərk edib Şimali Amerikaya köçmüşdülər. Cütlük sonrakı illərdə kral ailəsi ilə münasibətləri və Britaniya mediasına dair açıqlamaları ilə tez-tez gündəmə gəlib.
Onlar Britaniyanı tərk etmələrinin səbəbləri arasında medianın təzyiqini, Britaniya qurumlarında irqçilik iddialarını, onlayn təqibləri və ailədaxili problemləri göstəriblər.
Harri son illərdə Britaniyaya bir neçə dəfə səfər edib. O, 2022-ci ildə nənəsi Kraliça II Yelizavetanın dəfn mərasimində, 2023-cü ildə isə atası Kral III Çarlzın tacqoyma mərasimində iştirak edib.
Harri, Meqan və övladları iyul ayında Britaniyaya ailə səfəri zamanı Kral Çarlz və Kraliça Kamilla ilə görüşüblər. Kral ailəsi onları Qlosterşirdə yerləşən Hayqrov Evində qəbul edib.
Bu görüş Kral Çarlzın Harri, Meqan və uşaqları ilə təxminən dörd ildən sonra ilk dəfə bir araya gəlməsi kimi diqqət çəkib.
Harri həmin səfər zamanı xeyriyyə tədbirlərində də iştirak edib. O, yaralı hərbçilər və veteranlar üçün yaratdığı “Invictus Games” layihəsi ilə bağlı tədbirlərdə olub.
Harri Britaniyaya qayıtmaq məsələsində təhlükəsizlik problemini dəfələrlə gündəmə gətirib. O, kral həyatından uzaqlaşdıqdan sonra Britaniya hökumətinin onun üçün dövlət hesabına təmin edilən təhlükəsizlik səviyyəsini azaltmaq qərarına etiraz edib.
Məhkəmədə məğlub olduqdan sonra Harri qərarın həyat yoldaşı və uşaqları ilə birlikdə Britaniyaya qayıtmasını çətinləşdirdiyini bildirib.
