"Dövlət qulluğu haqqında" Qanunda və digər qanunvericilik aktlarında edilən dəyişikliyə görə, dövlət qulluğunda mükafatlandırma mexanizminin ləğv edilməsi nəzərdə tutulur. Belə ki, yeni yanaşmaya əsasən, dövlət büdcəsi hesabına ödənilən mükafatlar tamamilə ləğv edilir. Bu dəyişiklik həm kollektiv, həm də fərdi mükafatları əhatə edir. Belə ki, indiyədək dövlət qulluqçularının fəaliyyətinə görə verilən əlavə təşviq ödənişləri artıq mövcud olmayacaq və əməkhaqqı sistemi daha vahid və şəffaf struktur üzərində formalaşdırılacaq.
Fortunamag.az “Oxu.az”a istinadən xəbər verir ki, əvvəlki qaydalara əsasən isə dövlət qulluqçularının mükafatlandırılması üçün hər il dövlət büdcəsində əlavə vəsait ayrılırdı. Bu vəsaitin il ərzində həcmi əməkdaşın aylıq vəzifə maaşının üç misli qədər müəyyən edilirdi və əsasən, bayram günləri münasibətilə kollektiv mükafatlar, həmçinin xidmətdə fərqlənən şəxslər üçün fərdi mükafatlar şəklində ödənilirdi.
Dövlət idarəçiliyində aparılan institusional islahatlar yalnız struktur dəyişiklikləri ilə məhdudlaşmır - bu proses, eyni zamanda, idarəetmə fəlsəfəsinin yenilənməsi, şəffaflığın artırılması və insan kapitalına verilən dəyərin gücləndirilməsi ilə xarakterizə olunur. Xüsusilə dövlət qulluğunda əməkhaqqı sisteminin müasirləşdirilməsi bu islahatların ən vacib istiqamətlərindən biri hesab olunur. Yeni yanaşma vahid, ədalətli və davamlı əməkhaqqı modelinin formalaşdırılmasına xidmət etməklə dövlət sektorunun effektivliyini artırmağı hədəfləyir. Uzun illər ərzində dövlət qulluğunda əməkhaqqı sistemi müxtəlif əlavələr, mükafatlar və fərqli ödəniş mexanizmləri üzərində qurulmuşdu. Bu isə həm şəffaflığın azalmasına, həm də əməkhaqqı bölgüsündə müəyyən disbalansların yaranmasına səbəb olurdu. Yeni islahatlar çərçivəsində əsas məqsəd bu parçalanmış sistemi aradan qaldırmaq və əməkhaqqını vahid struktur daxilində formalaşdırmaqdır. Yeni modelə əsasən, əvvəllər müxtəlif əlavələr şəklində təqdim olunan ödənişlər vəzifə maaşının tərkibinə daxil edilir. Bu yanaşma əməkhaqqının daha aydın və başadüşülən olmasına şərait yaradır. Dövlət qulluqçuları artıq öz gəlirlərini daha şəffaf şəkildə görə bilir, bu isə ümumi idarəetmədə etimad mühitini gücləndirir. Eyni zamanda, vahid struktur əməkhaqqı sistemində mövcud olan disproporsiyaların aradan qaldırılmasına xidmət edir. Oxşar vəzifələr üzrə çalışan şəxslər arasında maaş fərqlərinin minimuma endirilməsi bərabər imkanların təmin olunmasına gətirib çıxarır. Bu isə həm sosial ədalətin təmin edilməsi, həm də motivasiya mühitinin yaxşılaşdırılması baxımından mühüm əhəmiyyət daşıyır. Digər vacib məqam isə əməkhaqqının sabitliyi və proqnozlaşdırıla bilməsidir. Əlavələrdən asılı olan qeyri-sabit gəlir modeli əvəzinə, daha stabil və davamlı maaş sistemi dövlət qulluqçularının sosial rifahına müsbət təsir göstərir və onların uzunmüddətli planlaşdırma imkanlarını genişləndirir. Dövlət qulluğunda əməkhaqqı sisteminin təkmilləşdirilməsi yalnız maliyyə mexanizmlərinin dəyişməsi deyil, eyni zamanda, insan resurslarının idarəolunmasında yeni mərhələnin başlanğıcıdır. Müasir əmək bazarında rəqabət getdikcə gücləndiyi bir şəraitdə dövlət sektorunun da cəlbediciliyinin artırılması zəruri məsələyə çevrilib. Əvvəlki modeldə əməkhaqqının böyük hissəsinin əlavələrdən ibarət olması xüsusilə yeni işə başlayan və gənc kadrlar üçün əlverişli deyildi. Onların əsas maaşı nisbətən aşağı olduğu üçün özəl sektorla müqayisədə dövlət qulluğu daha az cəlbedici görünürdü. Bu isə istedadlı və perspektivli gənclərin dövlət sektoruna marağını azaldırdı. Yeni əməkhaqqı modeli bu problemi aradan qaldırmağa yönəlib. Sabit və rəqabətqabiliyyətli maaş sistemi yaradılmaqla dövlət qulluğunun əmək bazarındakı mövqeyi gücləndirilir. Bu, həm təcrübəli mütəxəssislərin cəlb olunmasına, həm də gənc və istedadlı kadrların dövlət sektoruna marağının artmasına şərait yaradır. Bununla yanaşı, sosial müdafiə məsələsi də ön plana çıxır. Daha stabil əməkhaqqı sistemi dövlət qulluqçularının sosial təminatını gücləndirir, onların həyat keyfiyyətini artırır və işə bağlılığını möhkəmləndirir. Bu isə nəticə etibarilə dövlət idarəçiliyində peşəkarlığın və davamlılığın təmin olunmasına gətirib çıxarır. Aparılan institusional islahatlar çərçivəsində dövlət qulluğunda əməkhaqqı sisteminin yenilənməsi strateji əhəmiyyət daşıyır. Şəffaflıq, ədalət və vahidlik prinsiplərinə əsaslanan yeni model yalnız mövcud problemləri aradan qaldırmaqla kifayətlənmir, eyni zamanda, gələcək inkişaf üçün möhkəm təməl yaradır. Bu dəyişikliklər dövlət idarəçiliyində keyfiyyətin yüksəldilməsinə, insan kapitalının daha effektiv istifadəsinə və cəmiyyətin dövlətə olan etimadının artırılmasına xidmət edir. Nəticədə daha güclü, dayanıqlı və müasir idarəetmə sistemi formalaşır ki, bu da ölkənin ümumi inkişafına birbaşa töhfə verir.Fortunamag.az
