Dünya maliyyə tarixində elə adlar var ki, onlar təkcə zənginliklə yox, düşüncə tərzi ilə yadda qalır. Warren Edward Buffett də məhz belə nadir şəxsiyyətlərdəndir. O, birja dünyasının “Omaha kahini” kimi tanınır və bu günə qədər qazandığı uğurlar onu müasir dövrün ən böyük investorlarından birinə çevirib.
Fortunamag.az bildirir ki, 1930-cu ildə ABŞ-ın Nebraska ştatının Omaha şəhərində dünyaya gələn Buffett hələ uşaqlıqdan fərqli düşüncə tərzi ilə seçilirdi. Digər uşaqlar oyunla məşğul olduğu vaxt o, pulun necə işlədiyini anlamağa çalışırdı. Altı yaşında babasının dükanından aldığı Coca-Cola şüşələrini daha baha qiymətə sataraq ilk qazancını əldə etməsi onun həyat yolunun başlanğıcı idi. Bu sadə hadisə gələcəkdə milyonları idarə edəcək bir zehniyyətin ilk addımı idi.
Buffettin yeniyetməlik illəri artıq kiçik biznes təcrübələri ilə yadda qalır. Qəzet paylayır, kiçik ticarətlə məşğul olur və qazandığı hər pulu yenidən investisiyaya yönləndirirdi. 11 yaşında ilk səhmlərini alması isə onun həyatında dönüş nöqtəsi oldu. O, artıq sadəcə pul qazanmır, pulun necə böyüdüyünü öyrənirdi.
Təhsil yolunda da Buffett fərqli idi. Wharton Business School-da başladığı universitet həyatı daha sonra Nebraska Universitetində davam etdi və o, iqtisadiyyat və hüquq sahəsində biliklərini dərinləşdirdi. Daha sonra "Columbia Business School"da məşhur iqtisadçı Benjamin Grahamdan dərs alması onun investisiya fəlsəfəsini tamamilə formalaşdırdı. Burada o, “dəyər investisiyası” anlayışını mənimsədi və bu yanaşma onun bütün karyerasının əsasına çevrildi.
Buffettin uğur sirri heç vaxt tələsik qərarlarda olmayıb. O, həmişə uzunmüddətli düşünməyi seçib. Onun məşhur fikri bu fəlsəfəni ən yaxşı şəkildə izah edir: “Başqaları qorxanda sən cəsarətli ol, başqaları cəsarətli olanda isə ehtiyatlı davran.”
1956-cı ildə ilk investisiya şirkətini qurması onun peşəkar maliyyə dünyasına tam girişini təmin etdi. Daha sonra Berkshire Hathawayin idarəsini ələ alaraq onu kiçik tekstil şirkətindən qlobal maliyyə imperiyasına çevirdi. Bu gün "Berkshire Hathaway" dünyanın ən böyük holdinqlərindən biridir və Buffett onun simvoluna çevrilib.
Onun investisiya portfeli Coca-Cola, Apple və digər nəhəng şirkətləri əhatə edir. Lakin Buffetti digərlərindən fərqləndirən təkcə sərvəti deyil, onun sabit və prinsiplərə əsaslanan düşüncə tərzidir. O, qısa müddətli qazancdan çox uzunmüddətli dəyərə inanır.
Buffett həm də xeyriyyəçiliyi ilə tanınır. Milyardlarla dollarlıq sərvətinin böyük hissəsini Bill & Melinda Gates Fonduna və digər xeyriyyə təşkilatlarına bağışlamaq qərarı onun dünyaya baxışını göstərir. Onun üçün sərvət yalnız yığmaq deyil, həm də paylaşmaqdır.
Bu gün Warren Buffett təkcə bir investor deyil, həm də bir məktəbdir. Onun həyatı sübut edir ki, uğur nə şansın, nə də təsadüfün nəticəsidir. Uğur səbrin, düzgün düşüncənin və ardıcıl qərarların məhsuludur.
Omaha şəhərində sadə həyat tərzi ilə yaşayan bu milyarder göstərdi ki, dünyanın ən zəngin insanı olmaq üçün ən bahalı həyatı yaşamaq vacib deyil. Əsas olan, doğru düşünmək və uzun yolun dəyərini anlamaqdır.
Warren Buffettin hekayəsi bir nəticə deyil, bir dərsdir. Bu dərs hələ də milyonlarla insana eyni mesajı verir: pul qazanmaq olar, amma onu idarə etmək sənətin ən çətin formasıdır.
