Fortunamag.az “AZƏRTAC”a istinadən xəbər verir ki, Milan şəhərində fəaliyyət göstərən azərbaycanlı dizayner Qalib Qasımovun təsis etdiyi “Institution” brendi növbəti dəfə beynəlxalq moda sahəsində diqqətləri üzərinə çəkməyi bacarıb.
Dizaynerin yeni “Collection 04 – Su” adlı kolleksiyası, suyun mənəvi və mədəni simvollarından ilham alaraq təqdim edilib. "Su" sözü qədim Proto-türk dilində "həyat və ruhun güzgüsü" anlamına gəlir və kolleksiyanın əsas mövzusu insan və təbiət arasında qurulan əlaqəni, eləcə də ənənə ilə müasirliyin modada birləşdirilməsini vurğulayır.
Yeni kolleksiya, ənənəvi çəpkən geyimlərindən ilhamlanan qadın jiletləri, əl işləri ilə hazırlanmış parçalar və xüsusi dizayn elementləri ilə zəngindir. Kolleksiyanın yaradılmasında Azərbaycanın Masallı və Lənkəran bölgələrindəki qadın icmaları yaxından iştirak ediblər. Burada əsasən Typha Latifolia (qamış/rüş) bitkisindən istifadə edilərək qədim toxuculuq ənənələri yenidən canlandırılıb.
Bundan əlavə, bəzi əl işləri Gürcüstandakı azərbaycanlı icmalar tərəfindən hazırlanıb. Bu işlər həm qədim Borçalı xalçaçılıq ənənələrini əks etdirir, həm də müasir materiallarla zənginləşdirilib. Məsələn, pambıq ayaqqabı bağlarından hazırlanan xüsusi parçalar, brendin unikal üslubunun simvoludur.
Tədbirə azərbaycanlı pianoçu Etibar Əsədli də xüsusi çıxışı ilə qatılıb. Canlı piano və DJ musiqisi ilə o, kolleksiyanın atmosferinə musiqi harmoniyası qataraq tədbirə rəngarənglik əlavə edib.
Qalib Qasımov “Institution” brendinin məqsədinin mədəni irsin qorunması, qadın icmalarının dəstəklənməsi və davamlı modanın təşviq olunması olduğunu bildirib.
Kolleksiya, İtaliyadakı Azərbaycan Mədəniyyət Mərkəzinin dəstəyi ilə təqdim olunub.
Fortunamag.az
