Alkoqol asılılığının əlamətləri bilindi

Rusiyanın Tula şəhərində fəaliyyət göstərən psixiatr-narkoloq Yuliya Perminova alkoqol asılılığının erkən əlamətləri barədə danışıb.

Fortunamag.az xəbər verir ki, mütəxəssis bu barədə “RIA Novosti” agentliyinə açıqlamasında məlumat verib.

Həkimin sözlərinə görə, alkoqol asılılığının ilkin simptomlarını bir çox hallarda insan özü də müşahidə edə bilər.

Yuliya Perminova bildirib ki, spirtli içkiyə bağlılığın formalaşdığını göstərən əsas əlamətlərdən biri içki qəbulunun getdikcə daha tez-tez baş verməsi və buna müxtəlif bəhanələrin tapılmasıdır. Məsələn, əvvəllər ayda bir dəfə içki qəbul edən şəxsin sonradan bunu həftəlik vərdişə çevirməsi risk siqnalı sayılır.

Ekspert həmçinin psixoloji asılılığın da mühüm göstərici olduğunu vurğulayıb. Onun sözlərinə görə, bəzi insanlar içki məclisi və ya alkoqol haqqında düşünən kimi özlərini daha yaxşı hiss etməyə başlayırlar və artıq məqsəd ünsiyyət deyil, sadəcə içki qəbul etmək olur.

Mütəxəssis təklikdə və gizli şəkildə spirtli içki qəbul etmək istəyinin yaranmasını da təhlükəli simptom kimi qiymətləndirib.

Bundan başqa, sərxoşluq zamanı aqressiv davranış, xarakterdə kəskin dəyişikliklər və sonradan baş verənləri xatırlamamaq kimi hallar da alkoqol asılılığının əlamətləri sırasındadır.

Perminova qeyd edib ki, ən ciddi mərhələlərdən biri insanın alkoqola emosional münasibətinin dəyişməsidir:

“Əvvəllər alkoqol sadəcə əhvali-ruhiyyəni yüksəldirdisə, asılılıq yarandıqdan sonra insan alkoqolsuz özünü narahat hiss etməyə başlayır”.

Onun sözlərinə görə, sərxoş vəziyyətdə tez-tez xəsarət almaq, şəxsi əşyaları itirmək, zaman və məkan hissinin pozulması da əlavə xəbərdarlıq siqnallarıdır.

Narkoloq vurğulayıb ki, sadalanan əlamətlərdən ən azı üçü eyni anda müşahidə olunarsa, gecikmədən mütəxəssisə müraciət etmək vacibdir.

Fortunamag.az