Filarmoniyada müasir Azərbaycan bəstəkarlarının əsərlərindən ibarət konsert

Azərbaycan Dövlət Akademik Filarmoniyasında “Kiçik dəniz küçəsi” silsilə konsertləri çərçivəsində keçirilən IV konsert uğurla baş tutdu.

Fortunamag.az “AZƏRTAC”a istinadən xəbər verir ki, konsertdə dirijor Əyyub Quliyevin rəhbərliyi, Q.Qarayev adına Azərbaycan Dövlət Kamera Orkestrinin müşayiəti ilə müasir Azərbaycan bəstəkarlarının əsərlərindən ibarət zəngin proqram təqdim olunub.

İlk olaraq Ayaz Qəmbərlinin violin və orkestr üçün Arif Məlikovun xatirəsinə həsr olunmuş “Memorial” əsəri səsləndirilib. Əsərin solisti violin ifaçısı Ümid Mustafazadə olub. Daha sonra Səid Qəninin simli və zərb alətləri üçün yazdığı “Ulduz beşiyi” əsəri təqdim olunub. Bu əsərdə solistlər Yusif Əlizadə, Səma Qanbayeva və Rəsul Zülfüqarlı çıxış ediblər.

Konsert Türkər Qasımzadənin Adil Mirseyidin sözlərinə bəstələdiyi səs, gitara və simlilər üçün “İki nəğmə” əsəri ilə davam edib. Əsərin ifasında solistlər Fəridə Məmmədova və Raul Hüseynov (soprano və gitara) dinləyicilərin rəğbətini qazanıb.

Gecənin finalında Tahir İbişovun piano və orkestr üçün Konserti səsləndirilib. Əsərin solisti pianoçu Atabala Manafzadə olub.

Konsert boyu musiqişünas Sara Timurova çıxış edərək səsləndirilən əsərlər haqqında musiqisevərlərə məlumat verib.

Fortunamag.az