Muxtar Babayev: İqlim riskləri ərzaq təhlükəsizliyi və iqtisadi sabitlik üçün çox ciddi çağırış yaradır

Kənd təsərrüfatı yalnız iqtisadi fəaliyyət sahəsi deyil, ərzaq təhlükəsizliyi və iqtisadi sabitlik üçün strateji əhəmiyyət daşıyan əsas sahələrdən biridir. Son illərdə dünyada iqlim və hava hadisələrinin xarakteri dəyişib. Əvvəllər bu hadisələr əsasən lokal və mövsümi xarakter daşıyırdı. Bu gün isə vəziyyət dəyişib və iqlim hadisələri daha tez-tez baş verir, daha güclü olur və daha geniş əraziləri əhatə edir.

Fortunamag.az AZƏRTAC-a istinadən xəbər verir ki, bu sözləri Azərbaycan Prezidentinin iqlim məsələləri üzrə nümayəndəsi Muxtar Babayev 5-ci Aqrobiznesin İnkişafı Forumunda çıxışı zamanı deyib.

Onun sözlərinə görə, son 50 ildə qlobal miqyasda hava və iqlimlə bağlı fəlakətlərin sayı təxminən 5 dəfə artıb.

“Sel hadisələri ən çox geniş yayılmış və ən çox təsir göstərən təbii fəlakətlərdən birinə çevrilib. Son onilliklərdə ümumilikdə 168 ölkədə 4700-dən çox sel hadisəsi baş verib. Bu hadisələr 3,2 milyarddan çox insanı əhatə edib. Ümumi iqtisadi zərər isə 1,3 trilyon dollar təşkil edib. BMT-nin Ərzaq və Kənd Təsərrüfatı Təşkilatının (FAO) məlumatına görə, son 30 ildə təbii fəlakətlər kənd təsərrüfatına 3 trilyon dollardan çox zərər verib. Bu, hər il təxminən 100 milyard dollardan çox itki deməkdir. Bu fakt bir daha göstərir ki, iqlim riskləri ərzaq təhlükəsizliyi və iqtisadi sabitlik üçün çox ciddi çağırış yaradır. FAO-ya görə, dünyada 2 milyard hektardan çox torpaq deqredasiyaya uğrayıb. Hər il isə milyonlarla hektar torpaq öz məhsuldarlığını itirir. İqlim dəyişiklikləri kənd təsərrüfatına çox ciddi təsir edir. Kənd təsərrüfatı özü də prosesin bir hissəsidir. Bu sektor qlobal istixana qazı emissiyalarının təxminən dörddəbirini təşkil edir”, — deyə Muxtar Babayev qeyd edib.

Fortunamag.az